BTC/USDT 🩸 • مجزرة بالبيتكوين وانهيار عنيف
شرح اللي صار:
اللي صار بالبيتكوين مو مجرد هبوط، هي "مجزرة" بكل معنى الكلمة. بعد ما كان السعر رايق وعم يلعب فوق الـ 120 ألف، فجأة أكل كتلة بيع مو طبيعية هبطت فيه بشكل عامودي. الشارت بيفرجينا شمعة حمرا بتخوّف، كسرت كل الدعوم اللي بطريقها وكأنها مو موجودة، ونزلت بالسعر من 120 ألف لقاع عند 102 ألف دولار بساعات قليلة.
شو ممكن يصير هلق؟
1. الارتداد المؤقت (طلعة كذابة): بعد كل هبوط قوي، كتير طبيعي نشوف ارتداد صغير لفوق، وهاد اللي عم يصير هلق. السعر عم يحاول يرجع شوي من خسائرو. هالطلعة ممكن توصلو لمناطق 115 ألف أو 119 ألف (هي المناطق كانت دعم وصارت هلق مقاومة).
2. السيناريو السلبي: رغم هالطلعة الصغيرة، الوضع العام صار سلبي بالكامل. القاع اللي تسجل عند 102 ألف هو هلق أهم دعم نفسي. إذا فشل السعر يكمل طلوع ويرجع نزل، ممكن يرجع يختبر هالقاع مرة تانية.
الزبدة:
السوق أكل كف مرتب غيّر كل موازينو. النظرة صارت سلبية عالمدى المتوسط. الطلعات الحالية على الأغلب هي مجرد تصحيح للموجة الهابطة الكبيرة. اللي بيفكر يشتري هلق، عم يخاطر مخاطرة كبيرة كتير لأنو البياعة هنون اللي ماسكين السوق.
🌪️📉
