🔴 ترامب من شوية قابل نتنياهو، ووافق على ضرب إيران مرة تانية، إذا أعادت بناء برنامجها الصاروخي والنووي...
وبالتوازي مع ده، الصين بترفض رفض صريح وصارم أي تدخل إسرائيلي في صوماليلاند، ورافضة تمامًا انفصالها عن الصومال، وفي نفس الوقت بتعمل دلوقتي مناورات عسكرية وتدريبات بتطوق بيها جزيرة تايوان بالكامل... وعلى الناحية التانية الحوثيين في اليمن أعلنوا إن أي وجود إسرائيلي في صوماليلاند هيكون هدف مشروع ليهم...
🟣 وفي الخلفية، مصر بتطبق خطة حصار دلوقتي على إثيوبيا وتوسعاتها هي وحليفها الصهيوني في القرن الإفريقي، وبتعمل تحركات مهمة جدًا في جيبوتي والصومال وإريتريا...
في كذا خبر حصلوا خلال الـ 24 ساعة اللي فاتوا، أنت محتاج تعرفهم وتفهم الرابط ما بينهم عشان تفهم أيه اللي بيدور في المنطقة والتطورات رايحة لفين، ف خلينا ناخدهم مع بعض واحدة واحدة... 👇
🔴1️⃣ نبدأ من واشنطن...
من شوية وحسب تقارير نقلتها شبكة CNBC وتقارير القاهرة الإخبارية، ترامب ونتنياهو اتقابلوا في البيت الأبيض أخيرًا، المقابلة اللي كان بقالهم كتير بيقولوا انها هتحصل... وفي خلال المقابلة دي، ترامب قال تصريحات كتير مهمة، نختص بيها بالذكر التصريح اللي جاي ده:
“Now, I hear that Iran is trying to build up again, and if they are we’re going to have to knock them down. We’ll knock them down. We’ll knock the hell out of them. But hopefully that’s not happening,”
🔸️ طب معناه أيه التصريح؟
معناه إن أمريكا ضمنيًا كده وبدون إعلان رسمي، بتدي لنتنياهو الضوء الأخضر إنه يضرب إيران؛ عشان هما كده كده عارفين إن إيران بالفعل بتبني برنامجها الصاروخي والباليستي بشكل واسع، وكنت اتكلمت عن ده في مقال سابق من كام يوم وحكيتلك القصة دي كلها... ف كون التصريح ده يخرج دلوقتي، معناه إن التحذيرات اللي كان بيقولها المحللين والخبراء العسكريين بإننا هنشهد جولة تانية في صراع إيران واسرائيل شكلها فعلًا هتحصل...
🔹️ وبالتوازي مع ده، مين بقى يدخل على الخط؟
2️⃣ الحوثيين في اليمن... اللي أعلنوا بردو في تصريحات نقلتها وسائل الإعلام من شوية، إن "أي وجود إسرائيلي يتم رصده في إقليم صوماليلاند سيتم اعتباره هدف مشروع"...
طب يعني أيه الكلام ده وأيه ابعاده؟!
🟢 يعني من الآخر كده؛ لو إسرائيل فكرت تحط قاعدة عسكرية أو مكتب استخبارات، أو حتى أي وجود أمني من أي نوع، فـ ده هيحوّل سواحل القرن الإفريقي لساحة مواجهة بالوكالة، ما بين الحوثيين المدعومين من إيران، وما بين إسرائيل... والمواجهة دي لو حصلت هتسبب طبعًا ضرر على مضيق باب المندب اللي بيمر منه 12% من حركة التجارة العالمية، ويعتبر هو شريان الحياة بالنسبة للسفن اللي جاية من قناة السويس أو رايحالها...
🟡 طب هو ليه أصلًا الحوثيين بيهددوا بحاجة زي دي؟
عشان يا صديقي لو اسرائيل بالفعل قدرت تأسس لوجود عسكري في إقليم صوماليلاند اللي اعترفت بيه إسرائيل من كام يوم، ف ده معناه إنهم هيبقوا فارضين نفوذهم على حركة التجارة والملاحة في باب المندب، وهتكون اليمن كلها مستهدفة لإن صوماليلاند موقعها قدام اليمن بالضبط على الشط التاني من البحر، والمسافة مش بعيدة...
🔵 إسرائيل عايزة تعمل خطوة استراتيجية بإنها تدعم انفصال صوماليلاند عشان تحط لنفسها رجل في قلب القرن الإفريقي، وفي نفس الوقت تهدد أمن مصر القومي من خلال السيطرة على حركة الملاحة في قناة السويس، وكمان تساعد إثيوبيا في إنها تاخد ميناء في صوماليلاند، يفتح قدامها سواحل البحر الأحمر ويخلقلها نفوذ بحري هيهدد مصر بردو بكل تأكيد...
يعني مصر في وسط كل القصة دي مستهدفة بعملية تطويق استراتيجي بيحاولوا يمارسوها علينا دلوقتي...
3️⃣ وعشان كده ف مصر خدت خطوات استراتيجية مهمة جدًا بردو بقالها اسابيع ويمكن شهور بتتنفذ، بس مش كتير يعرفوا هي أيه...
أول حاجة لازم تعرفها، هي إن مصر دلوقتي بتفرض حصار استراتيجي على إثيوبيا في منطقة القرن الإفريقي، عشان تمنع أي تمدد ليها أو لحليفها الصهيوني في إفريقيا...
🟠 ولهذا الهدف، فـ إحنا بالفعل بدأنا نعمق الشراكة الأمنية مع الصومال، وبعتنا بالفعل حوالي 10 آلاف جندي مصري ضمن بعثة الاتحاد الأفريقي (AUSSOM) لدعم الاستقرار في الصومال (اللي هي على حدود إثيوبيا)، وكمان حسب تقارير مصرية وعربية، وتقارير من صحيفة The National، فـ مصر بدأت في بناء نفوذ لوجستي واقتصادي في جيبوتي وإريتريا من خلال ترتيبات لتطوير موانئ محورية زي ميناء "دوراليه" في جيبوتي وميناء "عَصَب" في إريتريا، واللي هما يعتبروا بمثابة "رئة إثيوبيا" التجارية زي ما بتوصف المصادر، لإنها دولة حبيسة بتعتمد بشكل كبير على المنافذ دي...
طبعًا الخطورة على إثيوبيا هنا أن التحركات دي مش مجرد استثمارات بنية تحتية، الموانيء هنا بتتحول بمنتهى السهولة لأدوات قوة وضغط استراتيجي من غير ما تضرب عليهم ولا رصاصة... يكفي بس إنك تمتلك القدرة على التوسع والتشغيل والربط اللوجستي للموانيء دي، وباستثمارات هتاخد ورقة ضغط على دخول السفن وحركة السلع والبضائع نفسها اللي داخلة لإثيوبيا، وبالتالي تقدر تحول ده لكماشة تخنق اقتصادهم بيها في أي وقت...
4️⃣ بس أخطر حاجة بقى، واللي حصلت في خلفية الأحداث دي هي اللي عملته الصين...
الصين كانت بتراقب اللي بيحصل ده كله، وبعدين فجأة قررت تتكلم، وطلعت تصريحات رسمية قوية جدًا بترفض فيها الاعتراف الإسرائيلي بأرض الصومال أو "صوماليلاند"، وبترفض أي تدخل خارجي و"أي تآمر مع قوة خارجية" زي ما قالوا في البيان بتاعهم... وأكدوا على دعمهم الكامل لوحدة الصومال...
🟣 طب ليه الصين شاغلة نفسها بالقصة دي أصلًا؟!
عشان يا صديقي موقع صوماليلاند بيقع مباشرة على طريق الصين التجاري اللي بتبني فيه بقالها سنين، اللي هو مشروع "الحزام والطريق Belt & Road" أو طريق الحرير الصيني زي ما هو معروف بين الناس... الطريق ده بيمر مباشرةً عبر قناة السويس والبحر الأحمر، عشان يوصل بضائع وتجارة الصين لدول الشرق الأوسط ومنها لأوروبا... وأي تدخل اسرائيلي فيه معناه تدخل أمريكي بالتبعية، وأي حرب هناك هتسبب إغلاق باب المندب وبالتالي ضرر بالغ للصين واستثماراتها...
كمان في حاجة انت مش واخد بالك منها...
⚫️ الموقف الصيني هنا مش مجرد موقف عاطفي ولا أخلاقي… ده موقف وجودي، لإن أي اعتراف بانفصال دولة زي "صوماليلاند" بالقوة أو بالترتيبات الدولية، هيبقى بمثابة سابقة خطيرة على ملف تايوان اللي الصين عايزة تضمها ليها!
لما صوماليلاند تنفصل، أيه يمنع إن تايوان تعلن انفصالها هي كمان؟ وندخل بقى في حرب كبيرة... والصين عمرها ما هتسمح بكده، وعلشان كده، في نفس التوقيت تقريبًا، الصين بقالها ساعات بتعمل واحدة من أضخم المناورات العسكرية على الإطلاق حوالين تايوان...
🟢 تطويق كامل بالسفن الحربية والمدمرات، وإطلاق للصواريخ في البحر مع قوات بحرية ومقاتلات حربية بتحوم فوق سماء الجزيرة...كل ده هو رسالة بتتبعت لأمريكا مباشرة... إبعدوا عن القرن الإفريقي، وإلا العواقب هتكون وخيمة... ويمكن عشان كده ترامب رافض يعترف بصوماليلاند لحد دلوقتي...
الخلاصة يا صديقي إن كل التحركات والأخبار دي ممكن للوهلة الأولى تبانلك غير مترابطة، بس لو جمعتها وفهمت الخيط اللي بيربط ما بينها، هتقدر تكون نظرة عامة على مشهد خطير للغاية بيحصل دلوقتي في منطقة القرن الإفريقي... والمشهد ده قابل للتطور بشكل سريع مع دخلة السنة الجديدة، وأدينها متابعين مع بعض...
🔴 وفي النهاية لو وصلت لحد هنا، متنساش تعمل شير للبوست ده عشان يوصل لغيرك، ويعرف باللي بيحصل دلوقتي... والمصادر كلها في أول كومنت تحت. 👇
شكرًا.
#علام