"Hemant Kumar Mahto" من مواليد عام 2002 تقريبا بمدينة بوگارو في ولاية جهارخاند بالهند، يوتيوبر و صانع محتوى رقمي و صاحب قناة "MN Hemant" لي تتخص في التسويق الرقمي و كسب المال من الإنترنت.
المهم هاد حبيبنا ينحدر من هاد البلاصة لوسمها بوگارو لي لوكان تحوس عليها فالـMaps تخرجلك Error 404، تالمون محسوبة منطقة ظل تحت الظل و ڨوڨل لدوك مزال ما دخلهاش فالسيستام
هيا الحبيب في عام 2017 كان مزال ذر يقرا فالليسي أصلا، و ماكانش عندو تلفون و ماعلابالوش حتى واش معناها يوتيوب فما بالك حاجة كيما صناعة المحتوى، صحابو فالكلاصة يحكولو على اليوتيوب و راه فيه الدراهم و هو يحاول يندمج بيناتهم باسكو كان جاي من عيلة تحت خط الحياة مش الصفر
هيا واحد النهار روّح عند الوالدة تاعو لي كانت هيا الولي الوحيد عندو و بقى يحلل فيها باش تشري سمارت فون حتى و يكون ليها هيا شخصيا المهم يكون عندهم تلفون و إنترنت فالدار باش ما يتحرجش قدام صحابو، و يماه لبتلو الطلب و شرات تلفون صح، بصح ماكانش فيه إنترنت
هيا بعد مدة زادت دارت طلب خط إنترنت بتخفيض من المصنع لي تخدم فيه و أخيرا تحقق حلمو
و مور مدة هكذاك و هو ساكن فالتلفون فهم القالب و كي وصلت العطلة الصيفية و قعد وحدو فالدار، الحبيب تحمس و قالك علاش ما نديرش أنا تان فيديوهات، و بالاك تصدقلي و ندير منها دراهم و نعاون الوالدة و نصرف على روحي؟
هيا راح دار كيما فالصورة العلوية، حرفيا الصورة حقيقية حبيبنا الـStand تاع الكاميرا كان الرياشة تع دارهم لي أصلا الكاميرا ذاتها كان التلفون ذاتو لي شراتو يماه
طبعا محتواه فالبداية ماكانش أحسن حاجة و هو فالبداية كان ماشي بعقلية نجم المنتخب الوطني الأسطورة رزوقي "ما يهمش واش نديرو فالصطاد، المهم رانا فيه هه"
سيريو كان يتيري ڨوش دروات فأي عفسة، كيفاش تفتح جيمايل كيفاش ترجع حساب فايس طارلك سيرتو فديك المدة كانت حسابات فايسبوك تتغلق يوميا بسبب السياسة لي كان يتبعها الفايسبوك، و خونا كان يحضّر درسو قبل و يحوس على الحلول و يجي يدير الفيديو تاعو، و لازم راك لاحظتها خطرات تحوس على كاش حل لمشكل تقني واجهك تلقى السباقين كامل هنود
و بحلول عام 2020 الحبيب كان أتقن المجال تقريبا و وصل لأول 100 ألف مشترك فالقناة تاعو و تحصل على درع اليوتيوب لي يمدوه في هكذا إنجازات
و حاليا راح طوّر من محتواه كامل مالڨري ما راهش محترف ولا خبير تقني، لالا إنسان عادي جدا و زيد عاونو تطور أدوات الذكاء الإصطناعي و راه يدير في مجهود محترم و يجيبلو في مداخيل محترمة و الصورة السفلية خير دليل و قناتو حاليا راهي في ربع مليون مشترك و داخلة على 5 مليون مشاهدة و تدير حوالي 2000 إلى 4000 دولار شهريا
و خرج مؤخرا في لقاء مع منصة BrilliantRoad، وين حكى تفاصيل المشوار المتعب لي جاز عليه و قال أنو لحد الساعة مزال يعتبر روحو فاشل و ما وصلش للنجاح لي يطمح ليه، مالڨري 250 ألف متابع بالنسبة لواحد ساكن فالدوار لي عايش فيه هو يعتبر إنجاز كبير
طبعا و قال أنو الهدف تاعو ماشي المال و هنا باين يخرط لأنو لوكان صح مالقاش فيها مداخيل محترمة كان راه حبسها و راح شاف خدمة أخرى 🙋🏻