‏(المحكمة العليا تكسر سيف التعرفات)

المحكمة العليا الأمريكية تقرر (بأغلبية 6 أصوات مقابل 3) إلغاء معظم الضرائب الجمركية الشاملة التي فرضها الرئيس ‎#ترامب معتبرةً أنه تجاوز صلاحياته التنفيذية بموجب قانون الطوارئ (IEEPA).

القرار قد يجبر الحكومة على رد ما يصل لـ 175-200 مليار دولار تم تحصيلها من المستوردين. (ليش هاد القرار "قنبلة" بكل المعايير؟)

القرار اللي صدر اليوم الصبح هو أكبر "فرملة" لسياسة ترامب الاقتصادية من وقت رجوعه للبيت الأبيض.

خلونا نفكك القصة....

صلاحيات الكونغرس: المحكمة (بقيادة جون روبرتس) قالت كلمة وحدة "الدستور بيعطي سلطة فرض الضرائب والرسوم للكونغرس مو للرئيس" ترامب حاول يستخدم "قانون طوارئ" من سنة 1977 لحتى يفرض ضرائب عالمية والمحكمة اليوم قالتله: "هاد الكلام ما بيمشي"

مصير المليارات: الحكومة جمعت حوالي 175 مليار دولار من هي الضرائب بآخر سنة هلق في معركة قانونية تانية رح تبلش "مين رح يرجع هالمصاري للشركات؟ هاد المبلغ ضخم وممكن يعمل فجوة كبيرة بالميزانية الأمريكية.

رد فعل الأسواق: أول ما طلع الخبر أسواق الأسهم (Dow Jones و S&P 500) عملت "قفزة" إيجابية فورا والدولار نزل شوي.

ليش؟ لأن الشركات هلق عم تتنفس الصعداء إنه تكاليف الاستيراد رح تنزل بس "الذهب" لسا عم يحافظ على قوته بسبب "غموض" رد فعل ترامب القادم.

ترامب لن يسكت: القرار ما بيعني نهاية "الحروب التجارية" ترامب ممكن يلجأ لقوانين تانية (مثل القسم 301 أو 232) اللي بتسمح بفرض ضرائب لأسباب "الأمن القومي" يعني الجولة الأولى خلصت لصالح المعارضين بس المباراة لسا بأولها.

أهم شيء لازم تفهمه صديقي المتداول

"المحكمة العليا قصت جوانح ترامب التجارية" هي الضربة قوية لأنها بتمس أهم أداة كان ترامب عم يستخدمها بالضغط على دول العالم (مثل الصين وكندا والمكسيك)

السوق هلق عم يحتفل بس في "غصة" الخوف من إنه ترامب يرد بقرارات "أعنف" أو يضغط على الكونغرس ليشرع هي الضرائب.